டிசம்பர் பாக்ஸ் ஆபிஸ் ரேஸில் வடிவேலு… நாய் சேகர் ரிட்டர்ன்ஸ் ரிலீஸ் தேதியை அறிவித்த படக்குழு

மீண்டும் களத்துக்கு வந்த வைகைப்புயல்

தமிழ்த் திரையுலகில் தவிர்க்க முடியாத காமெடி நடிகராக கலக்கி வரும் வடிவேலு. இம்சை அரசன் 23ம் புலிகேசி படத்தில் ஹீரோவாக நடித்திருந்தார். சிம்புதேவன் இயக்கிய இந்தப் படத்தை ஷங்கர் தயாரித்திருந்தார். இந்தப் படத்தின் வெற்றியால், தொடர்ந்து ஹீரோவாக நடிக்க ஆர்வம் காட்டிய வடிவேலுவுக்கு சோதனை மேல் சோதனை ஏற்பட்டது. மீண்டும் ஷங்கர் தயாரிப்பில் சிம்புதேவன் இயக்கும் இம்சை அரசன் 24ம் புலிகேசி இரண்டாம் பாகத்தில் வடிவேலு கமிட் ஆகியிருந்தார்.

ரெடியான நாய் சேகர் ரிட்டர்ன்ஸ்

ஆனால், வடிவேலுவுக்கும் சிம்புதேவனுக்கும் ஏற்பட்ட பிரச்சினையால் வடிவேலுவுக்கு ரெட் கார்டு கொடுத்தது தயாரிப்பாளர் சங்கம். இதனால், பல வருடங்களாக படங்கள் இல்லாமல் வீட்டில் இருந்த வடிவேலு இப்போது சுராஜ் இயக்கியுள்ள நாய் சேகர் ரிட்டர்ன்ஸ் படத்தில் ஹீரோவாக நடித்துள்ளார். அதேபோல் மாரிசெல்வராஜ் இயக்கத்தில் உதயநிதி நடிக்கும் மாமன்னன் படத்திலும் முக்கியமான கேரக்டரில் நடித்துள்ளார். இந்நிலையில், நாய் சேகர் ரிட்டர்ன்ஸ் படம் மூலம் வடிவேலு மஜாவான கம்பேக் கொடுப்பார் என எதிர்பார்க்கப்படுகிறது.

ரிலீஸ் தேதி கன்ஃபார்ம்

வடிவேலுவுடன் ரெடின் கிங்ஸ்லி, சூப்பர் சிங்கர் ஷிவாங்கி உள்ளிட்டோர் நடித்துள்ள நாய் சேகர் ரிட்டர்ன்ஸ் படத்திற்கு சந்தோஷ் நாராயணன் இசையமைத்துள்ளார். இந்தப் படத்தின் ஃபர்ஸ்ட் சிங்கிளான 'அப்பத்தா சாங்' சமீபத்தில் வெளியாகி ஹிட் ஆனது. பிரபுதேவா கோரியோகிராப் செய்திருந்த அப்பத்தா பாடலில் வடிவேலுவும் மாஸ் காட்டியிருந்தார். இந்நிலையில், நாய் சேகர் ரிட்டர்ன்ஸ் திரைப்படம் டிசம்பர் 9ம் தேதி திரையரங்குகளில் வெளியாகும் என படக்குழு அதிகாரப்பூர்வமாக அறிவித்துள்ளது.

காமெடி விருந்துக்கு ரெடியா?

நாய் சேகர் ரிட்டர்ன்ஸ் ரிலீஸ் தேதி அறிவிக்கப்பட்டுள்ளதால், வடிவேலுவின் ரசிகர்கள் இப்போதே படத்தை பார்க்க ஆர்வமாகிவிட்டனர். வடிவேலு - சுராஜ் காம்போ ஏற்கனவே வெரைட்டியான பல காமெடிகளை கொடுத்து ரசிகர்களை கொண்டாட வைத்தனர். இப்போது வடிவேலுவே ஹீரோவாக நடித்து முழுக்க முழுக்க காமெடி ஜானரில் உருவாகியுள்ள நாய் சேகர் ரிட்டர்ன்ஸ் படம் எப்படி இருக்கும் என கேட்கவே வேண்டாம். சில வருடங்களாக படங்களில் வடிவேலுவை பார்க்க முடியாமல் இருந்த ரசிகர்களுக்கு, இந்தப் படம் டபுள் தமாக்கா ட்ரீட் கொடுக்கும் என சொல்லப்படுகிறது.