இந்த இளம் வயதிலேயே வெண்ணிலா கபடி குழு நடிகர் ஹரி வைரவன் மரணம் ஏன்.. பரிதாப பின்னணி

இளம் வயதில் மரணம்

உடல்நலக்குறைவு காரணமாக விஷ்ணு விஷாலின் வெண்ணிலா கபடி குழு படத்தில் நடித்த நடிகர் ஹரி வைரவன் இன்று அதிகாலை 12.15 மணிக்கு காலமானார். சினிமா துறையில் ஏகப்பட்ட நடிகர்கள் இளம் வயதிலேயே மாரடைப்பு உள்ளிட்ட நோய்களால் உயிரிழந்து வருவது பெரும் சோகத்தை ஏற்படுத்தி உள்ள நிலையில், ஹரி வைரவனின் திடீர் மரணம் பலரையும் அதிர்ச்சியில் ஆழ்த்தியது.

வெண்ணிலா கபடி குழுவில் அறிமுகம்

இயக்குநர் சுசீந்திரன் இயக்கத்தில் வெளியான வெண்ணிலா கபடி குழு படத்தில் விஷ்ணு விஷால் மட்டும் அறிமுகம் ஆகவில்லை. ஏகப்பட்ட புதுமுகங்கள் அறிமுகமானார்கள். அப்படி சினிமாவில் அறிமுகமானவர் தான் ஹரி வைரவன். குறைவான படங்களில் நடித்தாலும் கவனம் ஈர்த்த இவருக்கு பட வாய்ப்புகள் பெரிதும் கிடைக்காமல் வறுமையில் வாடி வந்தது குறிப்பிடத்தக்கது.

பரிதாப மரணம் ஏன்

பல ஆண்டுகளாக சர்க்கரை நோயால் பாதிக்கப்பட்டு வந்த நடிகர் ஹரி வைரவன் சினிமா வாய்பு இல்லாமல் வறுமையில் வாடி வந்தார். சம்பாதித்த பணமும் அவரது மருத்துவ செலவுக்கே சரியாகி விட்ட நிலையில், முறையான சிகிச்சை பெறுவதற்கு கூட அவருக்கு யாரும் உதவவில்லை. சிறுநீரகம் செயலலிழந்த நிலையில், கடந்த சில மாதங்களாக பேசக்கூட முடியாமல் அவதிப்பட்டு வந்தார். கருணை கொலை செய்து விடுங்கள் என்கிற அளவுக்கு சென்று விட்ட நிலையில், ஹரி வைரவன் ஒரு வீடியோ வெளியிட்டு இருந்தார். அதன் பின்னர், விஜய்சேதுபதி, விஷ்ணு விஷால், சூரி உள்ளிட்டவர்கள் சிறிய உதவி செய்தனர். சிகிச்சைக்குப் பிறகு உடல்நலம் தேறிவருவார் என எதிர்பார்த்த நிலையில், இன்று அதிகாலை சிகிச்சை பலனின்றி உயிரிழந்தது பலரையும் சோகத்தில் ஆழ்த்தி உள்ளது.

விஷ்ணு விஷால் வேதனை

நடிகர் ஹரி வைரவன் உயிரிழந்ததை அறிந்த நடிகர் விஷ்ணு விஷால் "ஸாரி வைரவன்.. உனது ஆத்மா சாந்தியடையட்டும்.. உன்னுடன் வெண்ணிலா கபடி குழு நடித்த நாட்கள் இன்னமும் மலரும் நினைவுகளாக உள்ளது என விஷ்ணு விஷால் தனது ட்விட்டர் பக்கத்தில் பதிவிட்டுள்ளார்.