‘அம்மா காமாட்சி, வந்துருக்குற புள்ளைகளுக்கு காப்பித் தண்ணி குடுமா…’-காலத்தால் மறையாத சண்முகசுந்தரம்

ஆரம்பகாலத்தில் நாடகங்களில் நடித்தவர், நடிகர் திலகம் சிவாஜி கணேசன் மூலம் ‘ரத்தத் திலகம்' படத்தில் அறிமுகமானார். பிறகு, ‘கர்ணன்', ‘இதயக்கனி' உள்ளிட்ட பல படங்களில் நடித்தார்.
ஷங்கர் இயக்கிய ‘நண்பன்', வெங்கட்பிரபு இயக்கிய ‘சென்னை-600028' மற்றும் சில படங்களில் குணச்சித்திர, காமெடி கதாபாத்திரங்களில் நடித்திருந்தார். இவர் சமீபத்தில் வெளியான ‘அன்பானவன் அசராதவன், அடங்காதவன்' படத்திலும் நடித்திருந்தார்.

‘கரகாட்டக்காரன் படத்தில் காந்திமதியின் தம்பியாக நடித்த இவர் பேசும் வசனம் வெகு பிரபலமானது. அவர் பேச்சு நடை சற்று வித்தியாசமானது என்பதற்காகவே வெகுவாக ரசிக்கப்பட்டார். ‘சென்னை-600028' பட்த்தில் கிரிக்கெட் போட்டியின்போது டாஸ் போடும் அவர் அணி கேப்டனைப் பார்த்து ‘பௌலிங்கா... ஃபீல்டிங்கா...?' எனக் கேட்பார். அந்தக் காமெடி வசனம் ரசிகர்கள் மத்தியில் மிகப் பிரபலம்.

‘அம்மா காமாட்சி, வந்துருக்குற புள்ளைக்களுக்கு காப்பித்தண்ணி குடுமா...' என தோளில் போட்டிருக்கும் துண்டை நெஞ்சில் பிடித்துக்கொண்டே பேசும் சண்முக சுந்தரம் தமிழ் சினிமாவில் தேர்ந்த குணச்சித்திர நடிகர். சண்முக சுந்தரம் உங்களுக்கு அறிமுகமாகியிருந்தால், இந்த வசனம் உங்களுக்கு அவரது குரலிலேயே கேட்கும்.

ராதிகா லீட் ரோலில் நடித்த ‘அண்ணாமலை', ‘செல்வி', ‘அரசி' மற்றும் ‘வம்சம்' உள்ளிட்ட சில தொலைக்காட்சித் தொடர்களிலும் நடித்திருக்கிறார்.

பழம்பெரும் நடிகர் சண்முகசுந்தரத்தின் மறைவுக்கு திரையுலகைச் சேர்ந்த பலரும் இரங்கல் தெரிவித்து வருகின்றனர். அவரது மறைவுக்கு நடிகர் சங்கம் சார்பில் இரங்கல் அறிக்கை வெளியிடப்பட்டுள்ளது.