“லீலாவை யார் கொன்றது“..ஆவலை தூண்டும் விஜய் ஆண்டனியின் கொலை!

கொலை

விஜய் ஆண்டனி நடித்துள்ள கிரைம் திரில்லர் திரைப்படம் கொலை. இந்த படத்தை விடியும் முன் புகழ் இயக்குநர் பாலாஜி குமார் இயக்கியுள்ளார். கொலை படத்தை இன்பினிட்டி & லோட்டஸ் புரொடக்சன்ஸ் தயாரித்துள்ளது. இந்த படத்திற்கு சிவகுமார் விஜயன் ஒளிப்பதிவு செய்துள்ளார். கிரீஷ் கோபாலகிருஷ்ணன் இசையமைத்துள்ளார்.

முன்னணி நடிகர்கள்

இந்த படத்தில் விஜய் ஆண்டனிக்கு ஜோடியாக நடிகை ரித்திகா சிங் நடித்துள்ளார். மீனாட்சி சவுத்ரி, ராதிகா சரத்குமார், முரளி சர்மா, அர்ஜுன் சிதம்பரம் உள்ளிட்ட பலர் இந்த படத்தில் நடித்துள்ளனர். பிரபல ஹாலிவுட் திரைப்படமான நைஃப்ஸ் அவுட் பாணியில் உருவாகியுள்ள இந்த படத்தில் விஜய் ஆண்டனி மற்றும் ரித்திகா சிங் இருவரும் துப்பறியும் கதாபாத்திரத்தில் நடித்துள்ளனர். இந்த படத்தின் இறுதிக்கட்ட பணிகள் நடைபெற்று வருகின்றன.

“லீலாவை யார் கொன்றது“ என்ற கேள்வி

இப்படத்தின் மோஷன் போஸ்டரை படக்குழு கடந்த வாரம் வெளியிட்டது. அந்த மோஷன் போஸ்டரில் படத்தில் நடிக்கும் ஒவ்வொரு கதாபாத்திரத்தையும் வித்தியாசமான முறையில் படக்குழு அறிமுகப்படுத்தியது. மேலும் இறுதியாக "லீலாவை யார் கொன்றது" என்ற கேள்வியுடன் மோஷன் போஸ்டர் முடிந்தது. ஒரு அற்புதமான இசையில் பழைய எவர்க்ரீன் பாடலான புதிய பறவை படத்தில் வரும் பார்த்த ஞாபகம் இல்லையோ பாடலோடு அட்டகாசமாக இருந்தது.

க்ரைம் திரைப்படம்

க்ரைம் த்ரில்லர் ஜானரில் ஒரு கொலையை சுற்றி நகரும் வகையில் இப்படத்தின் திரைக்கதை அமைந்துள்ளது. இந்த மோஷன் போஸ்டர் வெளியானதில் இருந்து லீலாவை யார் கொன்றது என ஹேஸ்டேக் சமூக வலை தளங்களில் டிரெண்டாகி வருகிறது. இந்த படத்தை திரையில் காண ரசிகர்கள் ஆர்வமாக உள்ளனர்.