12 நாட்களில் 12 இந்திய படங்கள்...எந்த படத்தை எந்த ஓடிடி தளத்தில் பார்க்கலாம் ?

ஜேம்ஸ் – ஏப்ரல் 14

கன்னட சூப்பர் ஸ்டார் புனித் ராஜ்குமார் மரணத்திற்கு பிறகு வெளியாகும் அவர் நடித்த முதல் கன்னட படம் ஜேம்ஸ்.க்ரைம், த்ரில்லர் ஆக்ஷன் படமான இந்த படத்தில் புனித் ராஜ்குமார், இன்டலிஜன்ஸ் ஆபீசராக நடித்துள்ளார். மோசமான குற்றச் சம்பவங்களை கண்டுபிடித்து அழிப்பதை பற்றிய கதை. பிரியா ஆனந்த், சரத்குமார், ஸ்ரீகாந்த் உள்ளிட்டோர் நடித்துள்ளனர். இந்த படம் சோனி லைவ் தளத்தில் ரிலீசாகி உள்ளது.

செல்ஃபி – ஏப்ரல் 14

நாட்டில் கல்வித்துறையில் நடக்கும் முறைகேடுகள், ஊழல்கள் பற்றி கூறும் படம் செல்ஃபி. ஜி.வி.பிரகாஷ் ஹீரோவாக நடித்துள்ள தமிழ் படம். கெளதம் மேனன், வர்ஷா பொல்லம்மா, சங்கிலி முருகன், சுப்ரமணியம் சிவா, வித்யா பிரதீப், வாகை சந்திரசேகர், தங்கதுரை உள்ளிட்ட பலர் நடித்துள்ளனர். இந்த படம் ஆஹா தமிழ் தளத்தில் ரிலீசாகி உள்ளது.

ஆடவல்லு மீக்கு ஜோகார்லு – ஏப்ரல் 15

தெலுங்கு ரொமான்டிக் காமெடி படமான ஆடவல்லு மீக்கு ஜோகார்லு படத்தை கிஷோர் திருமலா எழுதி, இயக்கி உள்ளார். 5 வலிமையான பெண்களால் வளர்க்கப்படும் சர்வானந்த், அவரை காதலிக்கும் பெண்ணாக ராஷ்மிகா மந்தனா நடித்துள்ளனர். 5 பெண்களின் மனங்களில் இடம்பிடித்து எப்படி காதலில் வெற்றி பெறுகிறார் என்பது தான் படத்தின் கதை. இந்த படத்தில் குஷ்பு சந்தர், ராதிகா சரத்குமார், ஊர்வசி உள்ளிட்டோர் நடித்துள்ளனர்.

பச்சன் பாண்டே – ஏப்ரல் 15

ஆக்ஷன் காமெடி இந்தி படமான பச்சன் பாண்டே படத்தில் அக்ஷய் குமார், கேங்ஸ்டராக நடித்துள்ளார். அவரின் வாழ்க்கையை பயோ பிக்காக எடுக்க ஆசைப்படும் டைரக்டராக கிருத்தி சனோன் நடித்துள்ளார். இவர்கள் இடையே நடக்கும் நிகழ்வுகளை காமெடியாக சொல்லி உள்ள படம். இந்த படம் அமேசான் பிரைம் வீடியோவில் ஏப்ரல் 15 ம் தேதி ரிலீசாக உள்ளது.

பிளட்டி மேரி – ஏப்ரல் 15

ஓடிடி.,யில் வெளியாகும் நிவேதா பெத்துராஜின் முதல் படம் பிளட்டி மேரி (Bloody Mary). சஸ்பென்ஸ் த்ரில்லர் தெலுங்கு படமான இந்த படத்தை சாந்தூ மோன்டேடி எழுதி, இயக்கி உள்ளார். ராஜ்குமார் காசிரெட்டி, கிரீதி, பிரம்மாஜி, அஜய் உள்ளிட்டோர் நடித்துள்ளனர். இந்த படம் ஆஹா வீடியோவில் ஏப்ரல் 15ம் தேதி ரிலீசாக உள்ளது.

என்ன சொல்ல போகிறாய் – ஏப்ரல் 15

தமிழ் ரொமான்டிக் காமெடி படமான என்ன சொல்ல போகிறாய், டைரக்டர் ஏ.ஹரிஹரன் எழுதி, இயக்கி உள்ள படம். அஸ்வின் குமார் லட்சுமிகாந்தன், தேஜு அஸ்வினி, அவந்திகா மிஸ்ரா, புகழ், டெல்லி கணேஷ், சுப்பு பஞ்சு உள்ளிட்டோர் நடித்துள்ளனர். இந்த படம் ஜீ 5 தளத்தில் ஏப்ரல் 15 ம் தேதி ரிலீசாக உள்ளது.

வெயில் – ஏப்ரல் 15

மலையாள குடும்ப படமான வெயில் படத்தை டைரக்டர் சரத் மேனன் இயக்கி உள்ளார். ஷேன் நிகாம், ஷைன் டாம் சாக்கோ, ஸ்ரீரேகா, சையது இம்ரான் உள்ளிட்டோர் நடித்துள்ளனர். குடும்ப உறவுகளுக்கு இடையேயான சிக்கல்கள், உறவுகளின் முக்கியத்துவம் பற்றி கூறப்பட்டுள்ள படம். இந்த படம் அமேசான் ப்ரைம் வீடியோவில் ஏப்ரல் 15 ம் தேதி ரிலீசாக உள்ளது.

மெயின் வியாக் நஹி கரோனா தேரே நால் – ஏப்ரல் 15

பஞ்சாமி ரொமான்டிக் படமான மெயின் வியாக் நஹி கரோனா தேரே நால் படத்தை ருபிந்தர் இந்தர்ஜித் இயக்கி உள்ளார். குர்னாம் புல்லர், சோஜம் பஜ்வா ஆகியோர் நடித்துள்ளனர். கனடாவில் வசிக்கும் என்ஆர்ஐ யூட்யூபர் முதல் முறையாக பஞ்சாபிற்கு வருகிறார். இங்குள்ள கிராமத்து பெண் மீது காதல் கொள்கிறார். அந்த பெண் யார் என்பதை கண்டுபிடிக்க உதவுவது தான் படத்தின் கதை. இந்த கதை ஜீ 5 தளத்தில் ஏப்ரல் 15 ம் தேதி ரிலீசாக உள்ளது.

துல்சிதாஸ் ஜுனியர் – ஏப்ரல் 19

ஸ்னூக்கர் விளையாட்டை மையமாகக் கொண்ட படம். ராஜீவ் கபூர், சஞ்சய் தத் நடித்துள்ள படம். முக்கியமான ஸ்னூக்கர் போட்டி ஒன்றில் தந்தை தோற்று விடுகிறார். அவரின் 13 வயது மகன் கடினமான இந்த பயணத்தை தொடர்ந்து, முன்னாள் போட்டியாளரான முகம்மது சலாமின் உதவியால் தனது தந்தையின் பெயரை மீண்டும் வெற்றியாளர்கள் பட்டியலில் வர வைக்கிறான் இது தான் படத்தின் கதை. இந்த படம் நெட்ஃபிளிக்சில் ஏப்ரல் 19ம் தேதி ரிலீசாக உள்ளது.

குதிரைவால் – ஏப்ரல் 20

சைக்கலாஜிக்கல் படமான இந்த படத்தை டைரக்டர் ஜி.ராஜேஷ், மனோஜ் லியோனல் ஜான்சன், ஷ்யாம் சுந்தர் ஆகியோருடன் இணைந்து இயக்கி உள்ளார். கலையரசன், அஞ்சலி பட்டேல், செளமியா ஜகன்மூர்த்தி, ஆனந்த் சர்மி, சேத்தன் ஆகியோர் நடித்துள்ள படம். தூக்கத்தில் இருந்து எழுந்திருக்கும் போது ஒருவர் குதிரை வாலுடன் கண் விழிக்கிறார். அதற்கு பிறகு அவர் வாழ்க்கையில் நடப்பது தான் படத்தின் கதை. இந்த படம் நெட்ஃபிளிக்சில் ஏப்ரல் 20 ம் தேதி ரிலீசாக உள்ளது.

ஓ மை டாக் – ஏப்ரல் 21

மூன்று தலைமுறைகளை ஒன்றிணைத்துள்ள படம் ஓ மை டாக். விஜய்குமார், அருண் விஜய், அர்னவ் விஜய் ஆகிய மூன்று பேரும் தாத்தா-மகன்-பேரனாகவே நடித்துள்ள படம். அர்வவ் விஜய்க்கு அவர் வளர்க்கும் நாயான சிம்பா மீது இனம்புரியாத பாசம் ஏற்படுகிறது. இதை மையமாக வைத்து எடுக்கப்பட்டுள்ள படம். சூர்யா-ஜோதிகாவின் 2டி என்டர்டைன்மென்ட் தயாரித்துள்ள இந்த படம் அமேசான் பிரைம் வீடியோவில் ஏப்ரல் 21 ம் தேதி ரிலீசாக உள்ளது.

அந்தாக்சரி – ஏப்ரல் 22

அந்தாக்சரி, மலையாள சைக்கலாஜிக்கல் சஸ்பென்ஸ் த்ரில்லர் படம். அந்தாக்சரியை மையமாகக் கொண்ட படம். விபின் தாஸ் இயக்கத்தில் ஜீத்து ஜோசப் வழங்கும் இந்த படத்தில் சாய்ஜு குருப், விஜய் பாபு, சுதி கோப்பா, பினு பப்பா, பிரியங்கா நாயர் உள்ளிட்டோர் நடித்துள்ளனர். இந்த படம் சோனி லைவ் தளத்தில் ஏப்ரல் 22 ம் ரிலீசாக உள்ளது.