லிக்கர் மாபியாவும், லிக்கர் லாபியும்... 'குடிமகன்'களுக்கு தெரியுமா?

வெட்கப்பட வேண்டாமா?

புத்தாண்டுக்கு 200 கோடி ரூபாய்க்கு மது விற்பனை... பொங்கலுக்கு 450 கோடி ரூபாய்க்கு விற்பனை. மூன்று நாள் தொடர் விடுமுறையால் 200 கோடி ரூபாய் வரை வருமானம் போச்சே என்று புலம்புவதாக செய்திகள் வெளியாகின்றன. இது வெட்கப்பட வேண்டிய விசயம் என்று வேதனைப் பட்டார் அகில இந்திய ஜனநாயக மாதர் சங்கத் தலைவி.

லிக்கர் லாபி தெரியுமா?

தமிழ்நாட்டில் எந்த கட்சி ஆட்சிக்கு வந்தாலும் மதுக்கடைகளை மூட நினைப்பதில்லை. இதற்குக் காரணம் லிக்கர் மாஃபியாவும், லிக்கர் லாபியும்தான். சாராய சாம்ராஜ்யத்தில் நடக்கும் விசயங்களைப் பற்றி சாமான்ய குடிமகன்களுக்குத் தெரிந்திருக்க நியாயமில்லை என்றார் தமிழருவி மணியன்.

ஓட்டுப்போட்டவர்களுக்கு பாட்டில்

பாட்டிலுக்கு வாக்குரிமையை விற்கும் அவலம் நம் நாட்டில் மட்டும்தான் நடக்கும். அரசுக்கு வருவாய் வருகிறதே என்பதற்காக மதுவை விற்பது நியாமற்ற செயல் என்று குமுறினர் சமூக ஆர்வலர்கள்..

அதே சமயம் மதுவிலக்கை அமல்படுத்தினால் மட்டும் மக்கள் குடிப்பதை விட்டு விடுவார்களா? கள்ளத்தனமாக எதையாவது வாங்கிக் குடித்து உயிரிழப்பார்கள் என்று தெரிவித்தார் டிஎன்பிஎஸ்சி தலைவர் நடராஜ்.

கருகும் மொட்டுக்கள்

குடியினால் பட்டமரம் வீழ்வது பாதிப்பை ஏற்படுத்தாது. ஆனால் பள்ளிக்கு செல்லும் பிஞ்சுகளும்தானே பாழாகிப் போகிறது என்ற கேள்வியை முன்வைத்தனர் சமூக ஆர்வலர்கள். குடியும் ஒருவித மனநோய்தான் என்று அதிர்ச்சியூட்டினர் மனநல ஆலோசகர்கள். எனவே சிறுவயதிலேயே பழகும் குடிப்பழக்கம்தான் பெரியவர்கள் ஆன பின்னும் தொடர்கிறது. அதை நிறுத்தவேண்டும் என்று நினைத்தால் கூட கடையைப் பார்த்த உடன் ஓடிப்போய் குடிக்கத் தோன்றுகிறது என்று கூறினர் அவர்கள். எனவே சரியான கவுன்சிலிங் மூலம் குடிப்பழக்கத்திற்கு ஆளானவர்களை தடுத்து நிறுத்த முடியும் என்றனர்.

எதுக்கு டார்கெட்

ஒரு மாதத்திற்கு இவ்வளவு விற்பனை செய்யவேண்டும். ஒரு ஆண்டிற்கு இத்தனை ஆயிரம் கோடி ரூபாய்க்கு விற்பனை செய்யவேண்டும் என்று டார்க்கெட் நிச்சயம் செய்வது என்பது கேவலமான விசயம். குடி மக்களை ‘குடி' மக்களாக மாற்றுவதற்கு அரசே டார்க்கெட் நிர்ணயம் செய்வது தமிழ்நாட்டைத் தவிர வேறு எங்கும் நடக்காத விசயம். அதுவும் இங்குள்ள பார்கள் கழிவறையை விட கேவலமானதாக இருக்கிறது என்று ஆதங்கப்பட்டனர் சமூக ஆர்வலர்கள். இந்த டார்க்கெட்டினால் டாஸ்மாக் ஊழியர்களும் மன உளைச்சலுக்கு ஆளாகின்றனர். சமயத்தில் தற்காலிக பணிநீக்கத்திற்கு ஆளாக நேரிடுகிறது.

எனவே நாட்டு மக்களின் குடியைக் கெடுக்கும் இந்த மதுவை ஒழிப்பதன் மூலம்தான் ‘குடி'மக்களை சிறந்த மக்களாக மாற்றமுடியும் என்று தெரிவித்தனர் மதுவுக்கு எதிரான மனப்பான்மை கொண்ட மக்கள்.

அரசு இதை கவனிக்குமா?